Parlamentario Xiomara Maduro a participa recientemente na e conversatorio titula “Papiamento, Un storia di seis siglo”, organisa pa Biblioteca Nacional den su Sala Arubiana-Caribiana.
Durante e actividad, participantenan a intercambia pensamento riba:
- E origen di Papiamento y su evolucion durante seis siglo.
- E balor cultural profundo cu e idioma tin pa Aruba.
- E retonan cu e lenga ta enfrenta den e era moderno y pa futuro.
Conscientisacion y Identidad nacional
Parlamentario Maduro ta enfatisa cu e ta di gran importancia pa lidernan, hobenan y comunidad participa activamente den conversatorionan asina. Segun Maduro, e tipo di dialogo aki ta crea consciencia riba e rol fundamental cu Papiamento tin den nos identidad nacional y ta stimula accion concreto pa proteha y fortalece nos lenga. “E dialogo habri riba nos idioma ta esencial pa garantisa cu Papiamento no solamente ta sobrebibi, sino tambe ta sigui florece den generacionnan mas hoben,” Maduro ta expresa.
Ademas, e parlamentario ta indica cu participacion den evento cultural y educativo ta yuda consolida e aprecio pa nos herencia linguistico y ta inspira colaboracion entre institucionnan y comunidad pa mantene nos idioma bibo.
Pa conclui, Parlamentario Maduro ta expresa su gratitud na Biblioteca Nacional, specialmente na e ekipo di Sala Arubiana-Caribiana, pa organisa un espacio asina importante pa reflexion y intercambio di conocemento.
Nos identidad ta biba den nos lenga. Ban honr’e, papi’e, skirbi’e y stim’e!
