Un di e momentonan cu mas a toca e publico durante e anochi di informacion riba HOFA y LWHO tabata e intervencion di empresario Alex Croes. Durante e encuentro, organisa pa Fraccion di PPA pa crea mas claridad y informacion riba e impacto potencial di e ley, Croes a comparti un reflexion cu a haya eco cerca hopi presente. Mientras lider di fraccion Eduard Pieters a enfatisa e preocupacionnan constitucional y huridico rond di articulo 38 di HOFA, comerciante Croes a trece e discusion bek na un nivel mas personal: autonomia.
“Autonomia no ta un palabra sin mas”
Segun Croes, e pregunta central ta simpel: “Si nos perde autonomia financiero, kico ta keda di nos autonomia?” El a compara e situacion cu un ciudadano cu traha duro pa mantene su cas y cu tuma responsabilidad pa su famia. Segun Croes, autonomia no ta solamente un concepto politico. Ta e derecho y capacidad di tuma bo propio decisionnan tocante bo futuro.
Status Aparte ta gana y no regala
Croes a recorda cu nos no a obtene Status Aparte facilmente. “E generacionnan anterior a lucha cu sodor, lagrima y sacrificio pa Aruba logra e posicion cu nos tin awe.” P’esey, segun e empresario, cualkier paso cu por limita e libertad di Aruba pa maneha su propio asuntonan financiero, mester ta analisa cu hopi cautela y responsabilidad.
Informacion y participacion ta esencial
E mensahe di Croes a conecta cu e tema central di e anochi: pueblo mester ta informa prome tuma e decisionnan historico. Durante e encuentro, lider di PPA Eduard Pieters a enfatisa cu e obhetivo principal no tabata pa crea division ni debate partidista, sino pa duna informacion y crea espacio pa dialogo. Pa Croes, precisamente esey ta e balor di e iniciativa.
“Mi no ta bisa pa pueblo lanta para pa crea caos. Mi ta bisa pa pueblo lanta para pa defende nos derecho y conserva loke e generacionnan anterior a lucha pa logra.”
Su mensahe final tabata uno di responsabilidad colectivo: proteha loke Aruba a construi y percura cu nos futuro generacionnan no perde loke tanto sacrificio a costa nos antepasadonan pa conkista.
