Tur hende por pasa den prueba, tur hende por pasa den necesidad, tur hende por haci un fout, pero esey no ta nifica final di bo careda, of final di bo bida, pasobra tur hende cu busca nan forsa den Senjor lo lanta ariba.
No ta pornada e palabra di Dios ta adverti tres dos biaha bisando:
Humiya boso mes anto bao di e man poderoso di Dios, pa e por halsa boso na e tempo apropia.
Tirando tur boso preocupacion riba dj’E pasobra E ta percura pa boso.( 1 Pedro 5:6).
Sea sobrio , sea alerta. Boso adversario, e diabel ta cana rond manera un leon cu ta grunja,buscando con e por devora. ( 1 Pedro 5:7).
Pesey somete boso mes na Dios, resisti e diabel. Y e lo huy for di boso.Hala serca Dios y E lo hala serca boso.( Santiago 4:7-8).
No ta boluntad di Dios pa ora nos ta pasa den prueba of necesidad nos corre busca refugio den cosnan di mundo, pasobra Droga, Alcohol, Parandiamento, Adulterio, bida di scuridad, inmoralidad y bagamunderia no ta trece ningun sanacion pa stress, depresion, y problema di salud mental.
Hende tin cu stop di ganja nan mes y busca nan forsa den Senjor, y nan goso tambe den Senjor.
Pasobra diabel a bini solamente pa horta, pa mata y pa destrui e no ta ofrece ningun tipo di forsa na e ser humano, solamente e ta brua bo mente, pone bo pensa cu bo tin forsa, y tur esey ta caba den perdicion.
Corda bon kico e palabra di Dios ta bisa den 1 Corintionan 6:19-20 : Of boso no sa, cu boso curpa ta e tempel di Spirito Santo, Kende ta den boso,kende boso tin di Dios,y cu boso no ta pertenece na boso mes. Pasobra boso a wordo cumpra pa un preis, pesey glorifica Dios den boso curpa.
Tin tres berdad cu ta parce cu hopi hende no sa di dje, pasobra si nan tabata sa di dje nan comportacion lo ta diferente:
Esun di prome ta 1 Juan 5:18-20 bisando:
Nos sa cu ningun hende cu nace di Dios, no ta haci pica,ma Esun cu a nace di Dios ta warde , y e malbado no ta mishi cune. Nos sa cu nos ta di Dios,y henter e mundo ta bao di control di e malbado. Y nos sa cu e yiu di Dios,a bin y a duna nos comprendemento, pa nos conoce Esun cu ta berdadero, y nos ta den Esun cu ta berdadero, den Su Yiu, Hesus Cristo. Esaki ta e Dios berdadero y bida eterno.Yiu chikitonan warda boso di idolatria.
E di dos ta: Y no sigi presenta e miembronan di boso curpa como instrumento di inhusticia, ma presenta boso mes na Dios como esnan bibo for di e mortonan. Y boso miembro nan como instrumento di husticia pa Dios, pasobra pica lo no tin dominio mas riba boso. Pasobra boso no ta bao di ley, ma bao di gracia.( Romanonan 6:13-14).
Pero awor e amor pa cosnan di mundo ta debilita hende, y esey mester tene masha cuidao cune, pasobra e palabra di Dios ta bisa lo siguiente:
No stima mundo, ni e cosnan cu tin den mundo.Si un hende ta stima mundo e amor di e Tata no ta den dje.pasobra tur loke tin den mundo, e deseo di carni, y e deseo di wowo, y e orguyo di bida no ta bini di e Tata. sino di e mundo.( 1Juan 5:15-16).
Nos refugio, nos fortalesa ta den Dios,ta for di Dios nos forsa ta bini.
Sinceramente, Pastor Marcel Balootje
