Den cuadro di Congreso AVP 2026 Era di Relevo, Joseph Maduro ta comparti su pensamento tocante cambio generacional y e responsabilidad cu ta bin cu e siguiente etapa. Maduro, kende tabata riba lista di partido AVP na 1973, a presencia diferente periodo y generacion den trayectoria di partido.
Mirando e generacion actual, Maduro ta observa hopi cara nobo y potencial entre e hobennan cu ta envolvi den politica. P’e, esaki ta un señal importante, pero relevo ta algo cu mester bay acompaña di preparacion, madures y responsabilidad.
Un di su consehonan ta pa un politico pensa bon prome cu papia. Segun Maduro, no tur cos cu bin na mente mester inmediatamente expresa; politica ta exigi capacidad pa reflexiona, scucha y comprende e consecuencia di palabra y decision.
Na mes momento, e ta mira cu e generacion nobo tin algo esencial: curashi. E ta mira hobennan cu ta determina, cu ta dispuesto pa tuma decision y cu tin potencial pa sigui crece den politica.
Maduro ta considera igualmente importante pa e generacion nobo beneficia di experiencia di esnan cu a pasa e caminda prome. Guia y conseho di personanan cu conoce partido y e materia politico por contribui na preparacion di futuro liderazgonan, sin kita espacio pa hobennan trece nan propio vision y un manera nobo di haci politica.
Pero entre tur e consehonan, tin uno cu pa Joseph Maduro ta fundamental:
“No lubida bo pueblo. Esey ta principal.”
Pa Maduro, politica finalmente ta trata di hende. Cambionan por bin, generacionnan por cambia y un partido por sigui evoluciona, pero contacto cu pueblo y comprension di su realidad mester keda presente.
E ta reconoce cu ainda tin trabou pa haci, pero ta mira prospectonan cu potencial entre e hobennan di awe. Su mensahe pa nan ta pa sigui prepara nan mes, tene curashi pa tuma responsabilidad, acepta guia caminda ta necesario y mantene nan principio mientras nan ta traha pa mañan.
Congreso AVP 2026 – Era di Relevo | 4 di october
