Durante Congreso AVP 2026 – Era di Relevo, Partido AVP a conta cu presencia di dos invitado di islanan ruman: Ruthmilda “Mimi” Larmonie-Cecilia, di PNP di Curaçao, y Jolinda Craane, di Union Patriotico Boneiriano (UPB) di Boneiro. Den nan discurso, tur dos a dedica palabra na Mike Eman y Wendrick Cicilia, mientras nan a pone enfasis riba continuidad di relacion entre e partidonan y importancia di cooperacion entre e islanan.
Larmonie-Cecilia a describi e traspaso di liderazgo despues di 25 aña como un momento significativo pa AVP. Segun e, relevo no ta simplemente un cambio di lider, pero un paso den direccion di futuro, renovacion y continuidad, cu respet pa historia y e trabou cu generacionnan anterior a haci.
El a indica cu generacion nobo ta asumi responsabilidad den un periodo cu diferente reto internacional y social cu por tin consecuencia directo riba costo di bida y bienestar di pueblo. Entre otro, el a menciona cambio climatico, pobresa y conflicto internacional como desaroyonan cu ta exigi atencion di lidernan nobo.
Dirigiendo su mes directamente na Wendrick Cicilia, Larmonie-Cecilia a reconoce e responsabilidad cu liderazgo di un partido cu un trayectoria largo ta trece. Su conseho tabata pa Cicilia keda fiel na su mes, mantene humildad y integridad, y sigui scucha e personanan rond dje cu por brinda conseho. Na mes momento, el a gradici Mike Eman pa su servicio y pa e rol di guia cu e por sigui cumpli pa generacion nobo.
Di su banda, Jolinda Craane a pone e momento di relevo den un contexto regional. El a señala cu UPB mes ta pasando actualmente door di un proceso di cambio di liderazgo, algo cu a haci su presencia na Congreso AVP particularmente relevante pa dje. Cu un tono personal, el a bisa cu e tabata “scuchando y tumando nota” di e proceso na Aruba.
Craane a recorda cu relacion entre UPB y AVP no ta algo recien. Segun e, for di e prome etapannan di UPB, diferente dirigente di Boneiro a mantene contacto cu lidernan di AVP. El a dedica mencion special na e aporte di defunto Mito Croes, particularmente den relacion cu Boneiro durante e periodo historico rond di 10-10-10, y a indica cu bou di liderazgo di Mike Eman e contactonan entre e partidonan a sigui fortalece.
Pa Craane, e fundeshi ey ta algo cu generacion actual tin responsabilidad di sigui construi riba dje. El a señala cu cambio geopolitico, economico y social tambe ta toca e islanan chikito, y cu ta importante pa partidonan cu un base cristian-democratico sigui crea espacio pa hobennan cu capacidad, liderazgo, curashi y compromiso cu bienestar di pueblo.
Den e contexto ey, Craane a expresa su deseo pa mira mas cooperacion entre Aruba, Boneiro y Curaçao, no solamente den politica, pero tambe den desaroyo economico, oportunidad pa hobennan y bienestar social.
Su mensahe na Wendrick Cicilia tabata directo: “Liderazgo ta un honor, pero riba tur cos ta un responsabilidad.” El a sigura Cicilia cu e por conta cu UPB y Boneiro durante e siguiente etapa.
Craane a dedica tambe palabra di gradicimento na Mike Eman pa su añanan di liderazgo y pa su contribucion na relacion entre e partidonan. Cu un toke di humor, el a señala cu un politico por bay cu pensioen, “pero politica no ta bay cu pensioen for di un politico.”
Tur dos intervencion a coincidi den un mensahe di continuidad: experiencia di generacionnan anterior por sigui sirbi como fundeshi, mientras un generacion nobo ta asumi responsabilidad.
Craane a finalisa su discurso cu un reflexion riba e potencial di cooperacion regional: “Nos islanan por ta chikito riba mapa, pero nos ambicionnan ta grandi.” Segun e, combinando experiencia cu generacion nobo, identidad cu vision y amistad cu cooperacion, e islanan por sigui busca mas oportunidad pa nan pueblonan.
