E crecemento continuo di Short-Term Vacation Rentals (STVR) ta exigi atencion pa e disponibilidad y accesibilidad di vivienda pa residentenan di Aruba. Parlamentario di AVP, Dennerich Kelly a destaca, durante e conferencia di prensa semanal di fraccion AVP, cu Aruba mester administra e desaroyo turistico y e necesidad di vivienda cu responsabilidad, pa ambos por contribui na bienestar di e pais.
Kelly a aclara cu su preocupacion no ta dirigi contra turismo, Airbnb of ciudadanonan cu ta uza nan propiedad pa genera un entrada adicional. E tema central ta con e crecemento di cas di huur na corto plazo ta relaciona cu un mercado di vivienda cu ya ta representa un reto pa hopi residente.
“Nos no mester scoge entre turismo y vivienda. Nos mester por administra ambos cu responsabilidad. STVR tin un luga den nos economia, pero e pregunta ta cuanto di nos vivienda Aruba por destina na cas di huur na corto plazo sin haci acceso na vivienda pa nos propio hendenan ainda mas dificil”, Kelly a expresa.
Pa e parlamentario, e debate mester basa riba informacion actualisa cu por duna un bista cla di e desaroyo di STVR y su relacion cu e mercado residencial. E ta considera necesario pa Gobierno sigui e crecemento aki cu data, pa por determina su impacto real y tuma decisionnan fundamenta.
Kelly ta reconoce cu STVR no ta e unico factor cu por influencia e prijs y disponibilidad di vivienda. Construccion, disponibilidad di tereno, costo di financiamento y demanda tambe ta forma parti. Precisamente pa esey, e ta considera importante pa evalua e diferente factornan hunto, sin atribui henter e problematica na un solo actividad.
E parlamentario a pone enfasis tambe riba e necesidad di vivienda pa e hendenan cu ta sostene nos economia, incluyendo esnan cu ta traha den turismo. E exito di e industria mester cana hunto cu oportunidadnan pa e trahadornan y nan famia por haya un lugar adecua y accesibel pa biba.
“Nos industria turistico ta depende di miles di hende cu tur dia ta bay trabou y ta contribui na Aruba su economia. E hendenan ey tambe mester por conta cu e oportunidad pa yega na un vivienda cu nan por paga”, Kelly a subraya.
Kelly ta yama pa un acercamento responsabel cu ta reconoce e contribucion economico di STVR y, alabes, ta duna debi atencion na e necesidadnan di residentenan. E meta ta pa Aruba sigui desaroya como destinacion turistico, mientras acceso na vivienda pa su propio comunidad ta keda un prioridad.
“Nos no por yega na un situacion caminda Aruba ta un lugar excelente pa bishita y inverti, pero cada biaha mas dificil pa e propio residente haya un lugar accesibel pa biba”, e parlamentario a conclui.
