Despues di añanan marca pa incertidumbre y espera, nos ta mira señalnan cla di progreso den e desaroyo di San Nicolas. E reinicio di actividadnan na MFA San Nicolas y e proceso di otorgamento di permiso pa e expansion di Secrets Baby Beach Aruba — ainda pendiente, pero claramente avansando — ta mustra cu desaroyo den region ta bira cada bes mas un realidad.
Segun parlamentario Otami Thomasia, esaki ta un paso positivo y un señal importante pa futuro di San Nicolas. Sin embargo, mester sigui fortalece progreso cu decisionnan concreto y implementacion efectivo pa garantisa cu e comunidad realmente beneficia di e desaroyo cu ta bini.
Na mes momento, a tuma paso significativo den Parlamento. Durante e reunion mas reciente, a aproba mocionnan cu ta trata punto fundamental pa futuro di San Nicolas. Esaki ta enfoca riba fortalecemento di e rol economico di e refineria, reduccion di dependencia riba un solo sector, exploracion di modernisacion y desaroyo sostenibel, y garantisa cu cualkier transicion ta tene cuenta cu impacto ambiental y resiliencia na largo plaso.
Ademas, mocionnan aproba a pone enfasis riba proteccion di e balor historico y cultural di e refineria, reconociendo su importancia profundo pa historia di Aruba y particularmente pa identidad di pueblo di San Nicolas. Segun Thomasia, esaki ta evidencia di progreso real. Pero su persona a enfatisa cu progreso riba papel mester bira progreso den bida diario di comunidad. “Mey mey di tur e discusion aki ta keda un tema principal: e refineria y e tereno cu a keda atras,” parlamentario Thomasia a indica.
Durante decadanan, San Nicolas a carga e motor industrial di Aruba. E sector di refinacion a crea miles di trabou, a sostene famianan y a contribui fuertemente na crecemento economico di pais. Pero ora e actividad industrial a baha, loke a keda atras no tabata solamente tereno industrial, sino tambe ruina, incertidumbre economico y un comunidad cu na algun momento a sinti cu nan a keda atras.
Segun Thomasia, e sentimento aki no por wordo ignora ni minimisa. Tin parti di San Nicolas unda e restonan fisico di e refineria ainda ta para como un recordatorio di pasado, pero tambe como un señal di tarea cu ainda no ta completa. Tambe tin percepcion den comunidad cu e ritmo di desaroyo, inversion y atencion gubernamental no semper a move mesun manera pa tur parti di Aruba.
“Esaki no ta solamente infrastructura,” Thomasia a declara. “Esaki ta trata di inclusion, dignidad y sentido di pertenencia pa e pueblo di San Nicolas.” P’esey, su persona a enfatisa cu e momento actual ta crucial. Mocionnan aproba den Parlamento ta mustra un direccion strategico cla pa futuro di region. Entre e punto principalnan destaca ta:
- Explora oportunidadnan economico liga cu actividadnan industrial y logistico
- Move den direccion di modernisacion tecnologico y sostenibilidad ambiental
- Proteha y preserva balor historico y cultural di e refineria
- Fortalece planificacion, supervision y reportahe continuo tocante progreso di desaroyo
Sin embargo, parlamentario Thomasia a adverti cu direccion sin implementacion no ta suficiente. “San Nicolas no tin falta di intencion — tin falta di accion,” su persona a declara. Segun Thomasia, esaki ta implica un serie di paso concreto cu mester tuma den corto y mediano plaso. Entre e accionnan prioritario identifica ta:
- Finalisa un plan definitivo y transparente pa uzo futuro di tereno di refineria
- Realisa y publica evaluacion ambiental completo y accesibel pa comunidad
- Determina cua parti di tereno por reintroduci den uzo comunitario di forma sigur
- Identifica cua area mester keda industrial y defini claramente con e lo ta maneha
- Sigura cu desaroyo economico ta crea trabou real y oportunidad concreto pa habitantenan di San Nicolas
- Establece timeline cla pa implementacion y cumpli cu e compromisonan acorda
Parlamentario Thomasia tambe a pone enfasis riba importancia di responsabilidad y memoria institucional. E pueblo di San Nicolas a mira anteriormente situacion unda a uza tereno industrial intensivamente y despues laga atras sin plan adecua pa rehabilitacion. Segun su persona, e ciclo ey no por ripiti.
