Durante reunion publico, Parlamentario Xiomara Maduro a haci un serie di pregunta na Minister di Energia y Infrastructura, Arthur Dowers, tocante e ausencia di un plan concreto pa Aruba probecha e oportunidadnan economico cu ta surgi despues di e cambionan reciente na Venezuela. E cuestionamento aki ta duna seguimiento na e mocion aproba den Parlamento dia 26 di februari 2026, unda 20 parlamentario a vota pa Gobierno presenta, den un periodo di cuatro siman, un plan concreto cu ta indica detayadamente con Aruba por beneficia di e panorama nobo den region.
Gobierno ta manda señal contradictorio
Segun Maduro, Gobierno ta manda un señal ambivalente. Den partido AVP tin parlamentario cu ta positivo pa un futuro di e refineria, mientras cu den partido FUTURO tin parlamentario cu ta contra e refineria. E falta di claridad aki ta crea incertidumbre riba si Aruba realmente ta “open for business” of no. E parlamentario a enfatisa cu Aruba mester manda un solo mensahe fuerte y consistente na e mercado internacional.
Oportunidadnan real pa diversificacion
Ya na 2019, Aruba a identifica seis sector clave pa diversifica su economia, entre nan logistica. Awor, cu e situacion na Venezuela a cambia y exportacion di petroleo ta bira mas activo atrobe, expertonan ta indica cu e region ta mira un aumento den actividad logistico y transporte di crudo. Ademas, Aruba a yega di wordo uza caba como un punto strategico pa transporte di crudo Venezolano pa Estados Unidos. Maduro a splica cu, aunke Aruba ta chikito, nos tin potencial pa bira un hub strategico, mirando cu nos tin bentahanan unico manera:
- Cercania geografico na Venezuela
- Stabilidad politico
- Seguridad y trankilidad
- Bon conexion aereo y financiero
Esaki por posiciona Aruba como un “trusted hub” den region.
Rol di refineria y tank farm
Un punto importante di preocupacion ta e decision di Gobierno pa desmantela e refineria, mientras cu no tin claridad si a haci un estudio serio riba oportunidadnan alternativo. Maduro a haci e siguiente preguntanan:
- Kico ta e oportunidad pa Aruba uza su tankfarm pa warda y maneha crudo Venezolano?
- Ta existi un plan pa converti Aruba den un centro di transshipment of almacenamento?
- Ki oportunidad tin pa desaroya un sector di servicio maritimo completo, incluyendo crew change, catering, servicio tecnico, seguridad y servicio legal?
Rol di Hulanda y falta di investigacion
E parlamentario tambe a cuestiona e rol di Hulanda, despues cu a wordo sugeri cu Hulanda por yuda cu desmantelacion di e refineria. Segun Maduro:
- Con por ta cu tin apoyo pa desmantela sin cu tin un investigacion riba oportunidad economico?
- Dicon experticio Hulandes no ta wordo uza pa identifica oportunidad di negoshi pa Aruba?
- Of Aruba ta wordo laga afo di e cadena di balor economico?
Balor historico y cultural di refineria
Ademas, Maduro a enfatisa cu e refineria tin un balor historico y cultural profundo pa Aruba. Pa mas di 60 aña, e refineria a forma parti esencial di bida, trabou y desaroyo di e pueblo Arubano. Pa e motibo aki, e parlamentario a puntra si, den caso di desmantelacion, Gobierno lo tene cuenta pa:
- Conserva cierto parti di e refineria
- Proteha elemento cu tin balor historico
- Crea un espacio, monumento of recordatorio permanente pa mantene e historia bibo
“E refineria no ta solamente un facilidad industrial, pero un simbolo di nos historia y progreso,” Maduro a indica.
Necesidad di direccion cla
Maduro a conclui cu Aruba tin potencial pa crea entrada economico independiente, sin cu mester depende di Hulanda ni recuri na mecanismo manera Rijkswet HOFA pa haya financiamiento. Sinembargo, pa logra esaki, mester tin liderazgo firme y direccion cla. “Nos no por sigui sin movecion. E pais mester un plan concreto, un vision cla y un solo mensahe: Aruba ta ‘open for business’ of no,” asina Parlamentario Maduro a declara.
